Bogmenn og árið 2013

 

Bogmenn eru frelsiselskandi og ævintýragjarnir heimspekingar sem þyrstir í meiri þekkingu, meiri ferðalög og stærri heimsýn. Og nú verður þeim að ósk sinni. Meira af öllu sem einkennir þá. A.m.k. hjá Bogmönnum sem fæddir eru á bilinu 27. nóvember til 21. desember eða þar um bil. Bogmenn sem þurfa að sitja kyrrir við skrifborð geta bókstaflega orðið veikir ef þeir búa ekki við tilbreytingu og hreyfingu á árinu. Almennt þurfa Bogmenn að hafa frelsi til að ákveða hvar þeir eru og hvenær en núna eru þeir líklegir til að setja í ferðagírinn og leggja af stað út í heim. Kannski í nám en ef ekki þá alveg örugglega í frí, ef þeim er það mögulegt. Bogmenn sem komast ekki til útlanda ættu að ná sér í bæklinginn „Túristar á Íslandi“ og taka nokkrar túristaferðir en það gæti slegið á aukaverkanir. Bogmenn fæddir á bilinu 23. – 28. nóvember gætu lent í því að leggja af stað til A en lent á B, eða að í ljós komi að ferðaáætlunin er ekki nægilega vel skipulögð, þó hún hafi litið út fyrir það í upphafi ferðar. Það má alltaf biðja einhvern að líta yfir málin með sér ef þolinmæðin er ekki á þrotum. Bogmenn eru flestir bjartsýnir að eðlisfari en núna er hætt við að einhverjir fari fram úr sjálfum sér. Of mikið af einhverju veldur alltaf ójafnvægi sem getur farið í báðar áttir. Orðið of umfangsmikið eða fallið um sjálft sig en það er ekki þar með sagt að það verði ekki gaman hjá Bogmönnum, hvernig sem allt fer.

Forsíða